Vic Sotto bumilib kay Kristine Hermosa!

Bumilib si Vic Sotto sa pagiging professional ng leading lady niya sa Enteng Kabisote 4 na si Kristine Hermosa.

Kuwento ni Bossing, galing sa shooting nila ng EK4 sa Cavite si Kristine nu’ng Oktubre 7 nang aksidenteng mabangga ng sinasakyan nitong Hyundai SUV ang isang motorsiklo sa Maragondon, Cavite.

Maaga raw nagsimula ang shooting nila nu’ng araw na ‘yon at nagpaalam si Kristine nu’ng tanghali para pumunta sa promo ng Prinsesa ng Banyera sa TriNoma sa QC. Kasabay nitong umalis ng set si Joey de Leon na kinunan nu’ng araw na ‘yon ang special cameo appearance sa EK4.

Tama ‘yung napabalita na sabay umalis ng set sina Kristine at Joey pero hindi na nagawang saklolohan ni Joey ang aktres nang maganap ang aksidente, dahil nauna ang komedyante at mga six cars away ito kina Kristine kaya wala itong alam sa nangyari.

Natutulog si Kristine nang mabangga ng sasakyan niya ang motorsiklo at nagulat na lang siya paggising niya na nagkakagulo na ang mga tao.

Iniwasan umano ng driver ni Kristine na makasagasa ng maraming tao, kaya sumalpok ito sa nasabing motor.

Tumawag si Kristine sa set nila para humingi ng tulong at agad pinadala ni Bossing sa lugar ng aksidente ang marine commander na nagbabantay sa kanila sa shooting.

Shocked ang aktres, dahil nakita niya ang binatilyong driver ng motorsiklo na nakahandusay sa kalye at halos naliligo sa sariling dugo.

Ayon sa marine commander na sumaklolo kay Kristine ay wakwak ang magkabilang singit ng 16-anyos na bagets kaya bumulwak ang dugo nito matapos humampas at mabali ang manibela ng motor sa harapan nito.

Nadala pa raw ito sa Naic hospital pero hindi rin nagtagal. Ang angkas nitong babae ay nasaktan din pero hindi gaanong napuruhan.

Ang nakalolokah, tulala na nga at umiiyak si Kristine, dahil sa aksidente ay may mga ususero pa raw na nagagalit dahil hindi sila pinapansin ng aktres.

Awang-awa si Bossing kay Tintin, kaya pinayuhan niya itong umuwi na lang ng bahay at magpahinga. Bandang 10:00 PM ay bumalik pa ito sa set para tapusin ang kanyang mga eksena kahit namumugto ang mga mata nito sa kaiiyak.

May mga night effect pa kasi silang kukunan at tinapos ni Kristine ang shooting hanggang 5:00 AM. Sabi ni Bossing, kung sa kanya nangyari ‘yon ay uuwi na muna siya at saka na ulit magre-report sa shooting. Wala si Kristine nang dumalaw kami sa EK4 set sa Pasig, pero may mga apat na shooting days pa raw ito na puro big scenes.

Si Kristine ay gumaganap bilang si Faye, ang engkantadang misis ni Enteng sa pelikula. Kasama rin sa EK4 sina Oyo Sotto, Aiza Seguerra, Ruby Rodriguez, Jose Manalo at G. Toengi. May special guest roles sina Joey de Leon, Jomari Yllana, Ian de Leon, Ian Veneracion, Peque Gallaga, Candy Pangilinan at Francine Prieto. alan diones