ARA, NAITSA-PUWERA!

Pakiramdam ni Ara Mina ay parang naitsa-puwera siya dahil sa presence nina Manny at Jinkee Pacquiao sa GMA 7.

"I don’t feel I’m Kapuso," sambit ni Ara.

Ang dami raw nagtawagan sa kanya kung pupunta ba siya sa victory party kay Pacquiao, dahil leading lady siya sa pelikula nitong pang-MMFF, pero wala raw nag-imbita sa kanya.

Kinukulit siya ng mga showbiz-oriented talk show para interbyuhin tungkol sa pagdating ni Pacquiao, ngunit ayaw niyang magsalita dahil lagi na lang daw siya ang nagsasalita tungkol sa matagal nang isyung iyun. "Si Pacquiao na lang ang magsalita, ‘no?! Lagi na lang ako ang iniipit sa mga interview. Lagi na lang ako ang nagsasalita, tapos, tahimik lang siya. Dapat siya na ang magsalita dahil hindi naman talaga totoo," dagdag ni Ara. "Alam mo, nasasaktan na talaga ako, dahil parang naniniwala sila lahat. Hindi naman ako magkakaganito kung totoo ang isyu, eh hindi naman eh," humihikbing pahayag ng aktres.

Ang naramdaman lang daw ni Ara, kahit ang GMA 7 ay parang iniiwas siya sa mag-asawang Pacquiao na parang naniniwala pa sa isyu.
"Di ba dapat, pagharapin na kami para malinaw kung totoo ba talaga?" himutok ni Ara.

Sa ngayon ay tahimik na lang si Ara at ayaw na niyang magsalita, dahil tingin niya, wala namang kakampi o maniniwala sa kanya.
Bahala na raw kung itutuloy pa niya ang pelikula niya kay Pacquiao.

***

Si Polo Ravales ay hindi naniniwala sa isyu kina Ara at Pacquiao.
"Hindi gagawin ni Ara iyun. Sa tingin ko, ‘yung mga tao, naninira lang dahil meron silang pelikula. Pero tingin ko naman, kakayanin ni Ara iyan. Easy lang sa kanya ang intriga na iyan," pahayag ng aktor.

Nilinaw na rin pala ni Polo ang isyung sinulot daw niya si Rizza Santos kay Mark Bautista.
Itinatanggi ni Polo na nanliligaw siya kay Rizza. Kaibigan daw ito ng kapatid niyang si Ashley Gruenberg, kaya nakakasama nila itong lumalabas. "Never naman akong nanulot. ‘Di ko alam na nagdi-date sila (Mark at Rizza). Alam ko, magkakilala lang sila. "Di ko naman kasalanan kung sumasama si Rizza sa kapatid ko at madalas nagkikita kami. ‘Di ko naman siya nililigawan," sagot ni Polo tungkol sa isyung iyan.

Ang pagkakaalam din niya, kasali si Rizza sa ikalawang Celebrity Edition ng Pinoy Big Brother.

Ni Abu Tilamzik